عزم مداك أخره رغيف
وانت أليف مش غاوى مشاكل
قابل تتسمر على حالك
نوّرلى ناحية مدسوسك
مين علّق منك مفاتيحك
ونتف ريشك
ورماك وسط الزّنقه تهاتى
لكلاب الناحيه يعضّوك
لو حتقُلّى كلام كلاسيكى
ودراما لفلم رومنتيكى
أحسنلك
تشطب إسمك من جوّاك.
لسّه بتتنفّس بودانك؟
إلبس عقلك فك عنيه
إدخل بيته وشرب شاى
هز القارب يكتب موج
لوج على بصمه ليك تلبسها
يمكن تلقى الليل محبوك
تبقى عبيط
لو سلمت عنيك لإديه
ضهر الليل مسنود على قشّه
هشّه بعود كبريت ولّعها
تتبرجل حواليك الضّلمه
رشّة ضى
راح تدّيلك لمحه سريعه
ونّس شوفك من همستها
من لمستها
كابد واعزف لحنك صولو
ياما كتير م النّاس ح يقولوا
مش ح يطولوا
إلاالنّكد الصافى مرار
وكام مسمار يندق ف ضهرك
وانت بتجرى تسابق وقتك
ومفيش وقت تبص وراك.
ليست هناك تعليقات:
إرسال تعليق