صدقنى مش قادر اقراك
ولا عارف أرسملك صوره !
ليه مش واضح؟
نسمه وضلّه شجرك طارح
ليه ف الشّمس رامينى هناك
ليه جرحك بطّل يوجعنى
أو نمّل مرّه ف أعصابى
ليه فرحك بطّل يلمسنى
أوهلل ف الزّينه كيانى.
واللى تعسنى
إنك زىّ مش بتنام
أنا حيران ...
العيب فين؟
أنا مش ناكر
أن العشره م بينا شوارع
مرصوفه نور
وانا مش فاكر إن صوابعك
ليها ضوافر
أو ليك ناب للوقت الصّعب
إنفعلاتك فيها جنون لكن صافى
زى النبع.
:بص يا صاحبى
فعل التّوهه الحيره مسافه
واحتملات الريح موجوده
والأبيض أصبح متقلّب
والضّلمه السّكه المعهوده
والقادر ف الزحمه يعافر
يدخل ذاته
ويحددها كيف حتكون
دا المسكون بالدّنيا مجازف
ح يعيش فيها
ولا المسجون .
ليست هناك تعليقات:
إرسال تعليق