السّكّه اللى انا ماشى عليها
ملهاش سكّه
ولا يومى السّاكن أنا فيه
شايف بُكره
ولا عندى فكره عن راسى
ولاشىء فيها يمدّلى إيده
ولا كلمه منها تونّسنى.
أنا إنسان لكن مش شايفه
ولا صُدفه تعرفنى عليه
ولا من إسمه حرف لمسنى.
كل شوارع قلبى فراغ
رغم الشّمس الزّحمه عليها
بتخبّط فوق الأبواب
ومفيش حد بيفتح ليها.
واسألنى فين السّكان
ال عايشين كانوا ف أغانيها
وإزاى قدروا على العصيان
حتّى الذّكرى داسوا عليها.
تحت صهيل الليل مهزوم
بأكسّر ويّاه وجدانى
عايز أنسى إن انا إنسان
روحه بتصرخ جوّه كيانى.
ليست هناك تعليقات:
إرسال تعليق